Katika mistari ya leo, Yohana anatupa sababu za kumtukuza Bwana Yesu. Sababu ya kwanza ni kwamba Yeye ndiye shahidi mwaminifu. Kuna angalau mara tatu katika kitabu cha Ufunuo ambapo Yohana anatumia usemi huu “mwaminifu” kuhusiana na Bwana Yesu (1:4–5; 3:14; 19:11). Hapa Yeye ndiye shahidi mwaminifu. Kumekuwa na mashahidi wengi hapa katika tukio hili kwa ajili ya utukufu wa Mungu, lakini hakuna hata mmoja wao aliyekuwa bila dosari. Mmoja tu alikuwa mkamilifu, bila doa wala waa, na Mmoja tu ndiye angeweza kuitwa shahidi mwaminifu. Kuanzia horini hadi msalabani, alikuwa thabiti katika utumishi Wake. Akiwa na umri wa miaka kumi na miwili tunamsikia akisema, “Hamkujua ya kwamba lazima niwe katika mambo ya Baba Yangu?” (Luka 2:49). Shahidi huyu mwaminifu alisema kwa sauti kubwa, “Chakula changu ni kufanya mapenzi yake aliyenituma, na kuimaliza kazi Yake” (Yohana 4:34). Alikuwa mtumishi tegemezi ambaye angeamka asubuhi na mapema ili kupokea mwongozo Wake kutoka kwa Baba Yake (Marko 1:35). Kama shahidi mwaminifu, angetangaza, “Mimi nilizaliwa kwa ajili ya haya, na kwa ajili ya haya nimekuja ulimwenguni, ili niishuhudie kweli” (Yoh. 18:37).

Yohana anatumia neno hili kushuhudia angalau mara 72 katika maandishi yake, hasa kuhusu Bwana. Katika Ufunuo 3:14, tunamwona kama “Shahidi Mwaminifu na wa Kweli,” tofauti na kanisa linalojidai ambalo lingekuwa shahidi wake hadi atakaporudi (Matendo 1:8); lakini kanisa limeshindwa kuwa shahidi wa kweli. Katika Ufunuo 19:11, anaonekana kama “Mwaminifu na wa Kweli” atakayehukumu kwa haki!

Yohana anaanza kumtukuza Bwana Yesu kwa kutukumbusha kwamba alipokuwa hapa, Kristo alikuwa shahidi mwaminifu wa utukufu wa Mungu!

Mtangazaji wa Leo:
Ni faraja iliyoje katikati ya mambo yote yasiyo halisi na yasiyo na msimamo, kumgeukia Yeye ambaye hashindwi kamwe, Yeye anayedumu mwaminifu na wa kweli!