Tunapoanza kusoma sura hii ya kwanza ya Ufunuo, tunajifunza kutoka kwa sentensi ya ufunguzi kusudi na mada ya kitabu: ni Ufunuo wa Yesu Kristo. Injili zilimtaja Bwana Yesu kama Mwana wa Mungu akija ulimwenguni humu kwa unyenyekevu, lakini Kitabu cha Ufunuo kinaonyesha kuja kwake kwa pili, na tangu mwanzo kabisa wa kitabu tunamwona akiinuliwa! Tunapomwona katika kitabu hiki, tunamwona katika utukufu, ukuu, na nguvu!

Kinachostahili kukumbukwa unaposoma kitabu hiki ni kwamba mara ya mwisho ulimwengu usioamini ulipomwona Bwana Yesu ilikuwa alipokuwa Msalabani. Wakati mwingine watakapomwona Yeye atakuwa kama Mfalme aliyeinuliwa, akija katika utukufu na ukuu.

Katika kitabu chote cha Ufunuo, tunamwona Bwana Yesu Kristo akiinuliwa anapofunuliwa kupitia nyimbo, mashairi, ishara, na unabii. Kilichowekwa mbele yetu ni kufunuliwa kwa Bwana Yesu na Mungu Baba. Baba amefurahi kila wakati kumfunua Mwanawe kwetu. Mwanzoni mwa huduma ya Bwana Yesu, tunamsikia Baba akisema wakati wa ubatizo Wake, “Huyu ni Mwanangu mpendwa, ninayependezwa naye” (Mt. 3:17). Katikati ya miaka yake mitatu ya huduma ya hadharani, tunamsikia Baba akitangaza, “Huyu ni Mwanangu mpendwa, ninayependezwa naye; Msikilizeni!” (Mt. 17:5). Na katika Kitabu cha Ufunuo, tunamwona Mungu Baba akifunua utukufu wa Mtu aliyeinuliwa atakayetawala kama Mfalme wa Wafalme na Bwana wa Mabwana.